O Consello d’Administración de Zaragoza Vivienda -con o voto en contra d’o PP y l’abstención de Ciudadans- aprebó, o 9 de chinero d’iste anyo, encetar o proceso d’adchudicación pa la construcción d’un bloque en a carrera María d’Aragón d’o barrio d’as Fuents. Zaragoza en Común se comprometió con as vecinas y os vecins d’o vico en quitar abance a que ya ye una demanda historica. Hue ya ye una realidat a suya realización. Iste equipamiento municipal, comparte objetivos y tipolochía d’aloch con o prochecto de rehabilitación d’o quartel de Pontoneros situau en o Casco Historico.
Desgraciadament iste segundo (y tamién historico) prochecto ye estando bloquiau por o grupo municipal d’o PSOE (que deixó a Zaragoza en Común y CHA en minoría en o Consello de Zaragoza Vivienda obligando a la retira de l’expediente). Cal recordar que totz dos prochectos son contemplados en l’alcuerdo de presupuestos de 2016 y suposan una inversión total de 14 millons d’euros.
O prochecto, situau en As Fuents, suposa una important inversión, que será d’uns 6 millons y meyo d’euros. L’edificio disposará de 5 plantas, a primera será dedicada pa servicios comuns. Tabierna/restaurante, zona d’estar, unatra dedicada a la salut -rehabilitación-… En as 4 plantas superiors se repartirán os 80 aloches que oscilarán entre 44 m2 y os 60,53 m2. Os mesmos serán dotaus d’un dormitorio, salón/cocina y quarto de fico en augua. Os aloches irán dirichius a colectivos como mayors, chovens y unidatz familiars monomarentals u monoparentals. 12 aloches disposarán de dos dormitorios.
Tanto a promoción, como a chestión posterior de l’edificio, será 100% municipal. Al mesmo tiempo se pretende involucrar a os usuarios y usuarias en a chestión d’o prochecto, con especial ficacio a l’aprovechamiento d’as amplias zonas comuns.
Tercer boletín d’o grupo de treballo de vivienda “Especial As Fuents”.
Descarga aquí o boletín en PDF
Nota de prensa d’o Concello de Zaragoza
http://www.zaragoza.es/ciudad/noticias/detalle_Noticia?itz=224672