Dende Zaragoza en Común emparamos y animamos a participar en a manifestación convocada iste sabado 4 de febrero a las 17:00 horas por a Plataforma Antifascista de Zaragoza, ta amostrar o refuso a las chornadas de conteniu racista y xenofobo, organizadas por un partiu d’extrema dreita en a ciudat.
Observamos con preocupación l’auge d’a extrema dreita en Europa y Estados Unidos. O racismo, a xenofobia y o discurso de l’odeo atentan contra os Dreitos Humans fundamentals, rompen a convivencia en as nuestras ciudatz y barrios y por tanto, no han d’estar toleraus por a sociedat zaragozana.
Con a celebración de chornadas y actos racistas en a nuestra ciudat, a extrema dreita pretende sobater en Zaragoza a bandera d’a violencia y a discriminación y convertir a ciudat en punto de trobada d’o fascismo. No podemos obviar o feito que un d’os ponentes convidaus a istas chornadas sía o neonazi Pedro Varela, expresidente d’a organización d’extrema dreita CEDADE y propietario d’a Librería Europa de Barcelona, procesau y encarcelado por apolochía d’o genocidio y incitación a l’odeo racial.
Tampoco queremos deixar pasar que en un evento similar celebrau en marzo de 2015, un grupo de chovens antifaixistas estioron detenius y encausados por oposar-se a la celebración d’un concierto nazi en o barrio d’as Fuents y que en marzo de 2017 enfrentan un chudicio en el qual a ueito d’os diez les piden ueito anyos de prisión. En total, mas de 66 anyos de garchola y arredol de 30.000 euros de responsabilidat civil, por protestar contra o racismo y o faixismo en a nuestra ciudat.
Zaragoza ye una ciudat ubierta, acullidora y comprometida con a suya memoria democratica, por ixo nos oposamos rotundament a la celebración d’istas chornadas y femos un llamamiento a que as vecinas y vecins acudan a la manifestación convocada por a Plataforma Antifascista pa mostrar a suya refús absoluto a o racismo y a la xenofobia en os nuestros barrios.