Iste maitín en o Centro d’Historias de Zaragoza, Zaragoza en Común ha participau en a trobada interparlamentario con representants parlamentarios d’Unid❤s Podemos y de municipios, comunidatz y diputacions de toda a Cuenca de l’Ebro, pa alzar a voz y explicar as accions que ya se son levando a cabo contra una d’as mayors menazas ambientals d’o nuestro entorno: a central de Garonya.

Allí s’ha sinyau o manifiesto NUNCA MAS GARONYA que reproducimos contino:

Como representants de distintas institucions en os diversos territorios d’a cuenca de l’Ebro, tenemos o firme objetivo que a central de Santa María de Garonya no se reabra nunca por o risgo que suposaría pa la seguranza d’as personas y d’o meyo ambient; y por ixo somos aquí pa exichir o suyo zarre a o Gubierno, y manifestar o nuestro firme compromiso de luitar contra ista nuclear, dica aconseguir a suyo zarre definitivo. Istes son os nuestros motivos:

Garonya ye a central mas antiga d’o parque nuclear espanyol. Estió feita a devantadera por Franco en 1971. Cumplió por tanto os 40 anyos de vida util en l’anyo 2011, y manimenos haber teniu permiso dica 2013, leva zarrada por decisión d’a interpresa propietaria – NUCLENOR – mas de quatro anyos. Quatro anyos en el qual dengún la ha chitau de menos, porque a central de Garonya ye perfectament prescindible dende o punto de vista enerchetico.

En una decisión sin precedentes, o Consello de Seguranza Nuclear aprebó un dictamen favorable a la reobridura de Garonya, sin que a interpresa propietaria, Nuclenor, i hese sisquiera cumpliu con os requisitos exichius. Ye intolerable que o suposau organismo regulador independient d’o Gubierno y en una qüestión tant sensible como ista, incumpla as condicions que fixó previament por as suyas prisas en emitir o dictamen favorable. Nos enfrentamos a o risgo d’a suya reobridura, por una decisión que anteposa o beneficio economico a la seguranza d’as personas y d’o meyo ambient.

Ya entre os suyos anyos de funcionamiento, a central nuclear de Garonya presentó problemas de seguranza grieus. Entre ells l’aparición de crepas en a vasija d’o reactor, que levó a qualificar-la como a central d’as 1.000 crepas. Iste grieu problema que condiciona a seguranza nunca estió resuelto.

Garonya ye recalentando l’Ebro. O calentamiento de l’augua d’o rio Ebro en utilizar as suyas auguas pa refricherar a central ye una qüestión que preocupa, y que ha levau mesmo a la Confederación Hidrografica de l’Ebro a reclamar medidas pa privar iste impacto en l’ecosistema fluvial.

A central carece d’espacio pa almacenar os residuos radioactivos que se produzcan en caso de tornar a dentrar en funcionamiento, la qual cosa ha urgido a solicitar l’autorización pa un nuevo almacén de residuos radioactivos en o recinto d’a central nuclear.

Si istes problemas ya yeran preocupants antes, lo son muito mas 5 anyos dimpués de l’accident d’a central nuclear chaponesa de Fukushima. Garonya ye gemela d’o reactor numero 1 de l’accidentada Fukushima. Como conseqüencia d’aquell accident, i habió un punto d’inflexión en o desembolique d’a enerchía nuclear en o mundo. Países d’o nuestro entorno como Alemanya, optaron por proceder a o zarre progresivo y ordinau d’os suyos centrals nuclears. En Espanya, manimenos, o Partiu Popular optó por prolargar a vida d’as centrals nuclears dica os 60 anyos. Ixo ye o que s’amaga agora dezaga de l’absurda ideya de prolargar a vida d’ista viella central. Nusatros creyemos, en cambeo, que ha plegau a hora de cambiar o paradigma enerchetico, y d’empecipiar a construir un nuevo modelo basau en as enerchías renovables y a eficiencia enerchetica como fan os países mas abanzaus.

O modelo nuclear se resquebraja. Pa mayor escándalo, utilizan Garonya como una cortina d’humo dezaga d’a quala son urdiendo o nuevo gran regalo que van a fer a l’oligopolio enerchetico: l’alargamiento d’a vida d’as centrals nuclears dica 60 anyos u mas.

Existe una enorme preocupación social en toda a cuenca de l’Ebro por a posible reobridura d’a central de Garonya. Numerosos municipios han pediu o suyo zarre, tamién l’han feito os parlamentos vasco, navarro y aragonés, y son multiples as iniciativas y movilizaciones que reclaman o suyo zarre definitivo. O Gubierno NO puede seguir fendo sentius sordos a ista demanda ciudadana.

Garonya no ye necesaria dende o punto de vista enerchetico; a suya enchegada sería muit periglosa y por ixo ha chenerau un enorme refús social y politico. Exichimos que nunca mas torne a ubrir, y reclamamos una apuesta decidida por un modelo enerchetico limpio, sostenible y seguro.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies