O grupo de treballo d’esporte de Zaragoza en Común, publica un boletín especial pa explicar o proceso de regularización d’os Campos Municipals de Futbol. En o mesmo s’aborda a delicada situación churidica d’istas instalacions; as importants inversions previstas pa iste 2017; asinas como as linias prencipals d’a propuesta de contracto de cesión a os clubs de futbol realizada por o Concello de Zaragoza.

Compartimos o conteniu d’o boletín, y adchuntamos enlace a la versión en PDF: Boletín regularización Campos Municipals de Futbol

Por qué un proceso de regularización d’os campos municipals de futbol?

En 2016 a Concejalía d’Esporte anunció a enchegada d’o proceso de regularización d’os Campos Municipals de Futbol -CMF-. Actualment garra d’istas instalacions tiene un contracto en vigor, creyando una situación d’inseguridat churidica pa todas as partes y una falta de control inacceptable pa un ret componiu por 28 instalacions y mas de 40 terrenos de chugo. Amás, as importants inversions previstas en o futbol base -que suman quasi 3 millons d’euros- fan necesario resolver ista qüestión con urchencia pa acometer as mesmas con todas as guarencias.

Entre masiau tiempo s’ha manteniu ista situación y garra d’as zagueras corporacions intentó regularizarla u resolver-la. Ye mas, se realizoron cesiones que hue se troban en un limbo churidico y atras carecen de documento belún que certifique tant sisquiera a suya continuidat a precario. Isto -sin dubda- ye un problema pa totz: usuarios y usuarias, clubs y Concello.

Una situación similar ha conduciu a la privatización d’a chestión d’os campos por meyo d’interpresas de servicios en atras ciudatz. De feito, si no se regularizan existe un periglo permanent d’externalización. O PP -o mesmo que en Zaragoza s’oposa a este proceso de regularización- privatizó a chestión d’os campos municipals de Madrit sacar a os clubs y quitando-los a concurso. Hue as interpresas han desplazau a os clubs tradicionals d’os vicos madrilenyos. Queremos ista perspectiva t’as 28 instalacions d’a nuestra ciudat?

O proceso de regularización ofreix una oportunidat excepcional pa amillorar a chestión d’as instalacions. Por eixemplo, incluir pres publicos d’os alquileres a tercers; fixar dreitos t’as usuarias y os usuarios -como que tiengan dreito a estar socios tenendo voz y voto en a chestión- u establir una couta maxima por temporada. Unatra important propuesta ye a necesidat de promocionar o futbol femenín. Amás, a propuesta de contracto ya tresladada por o Concello de Zaragoza incluye a instalación de desfibriladores por parte municipal en todas as instalacions. Tamién se regulan as concesiones d’as tabiernas (actualment difuera de qualsiquier control).

O canon -simbolico t’os clubs d’os vicos rurals que no disposan de césped artificial-, no superará en as millors instalacions os 8.000 euros anuals. O mesmo se podrá minorar con milloras en a instalación y con a disminución d’o consumo electrico respective a l’anyo anterior. a previsión d’os tecnicos municipals ye que dito canon pueda quedar “a zero”. Por tanto, no existe garra fin recaudatorio en a regularización. O funcionamiento anual d’os campos municipals le cuesta a os vecins y as vecinas de Zaragoza 2.500.000 d’euros -sin incluir as inversions en milloras-. No somos intresaus en a rentabilidat economica d’as instalacions esportivas municipals, nos preocupa a suya rentabilidat social. Sin menospreciar a optimización d’o gasto u o favorecimiento d’o estalbio enerchetico, que le suposa 800.000 euros anuals a o Concello.

Reconoixemos o treballo desinteresau d’a immensa mayoría d’as directivas y voluntariado que fan posible o funcionamiento d’os clubs. No solament no somos intresaus en garra enfrentamiento, reconoixemos a suya labor con una propuesta de regularización y cesión. Con guarencias pa todas as partes y que ferá as nuestras instalacions millors.

Resumen d’a propuesta municipal de contracto de cesión

Proceso ubierto y dialogau

– En o verano de 2016 se realizó una asambleya en o Centro Civico de l’Almozara con todas as directivas d’os clubs. En a mesma se les tresladoron os obchectivos d’o proceso de regularización. S’han manteniu distintas reunions con representants designaus por a mayoría d’os clubs. Tamién numerosos contactos bilaterals.
– S’han incluiu qualques propuestas realizadas por os clubs, tamién matizado qualques d’as cláusulas propuestas por o Concello.
– Sin prisa, pero sin pausa. O proceso de dialogo sigue ubierto, encara que as inversions previstas nos obligan a realizar a regularización antes d’o final d’a temporada 2016/2017. Iste mesmo mes s’asumioron distintas propuestas (y atras son en estudeo) que os clubs nos han tresladau en una reunión en el qual participó o Concejal d’Esportes. Y s’alcordó mantener unatra proxima reunión pa tornar a realizar propuestas y modificacions.
– O pliego ye un punto de partida t’a concreción en cadagún d’os campos, en el qual continaremos as negociacions club por club, atendendo a las suyas especificidatz individuals

Guarencias legals

– Sinyamos un alcuerdo por 10 anyos (6 anyos mas dos prórrogas de dos anyos cadaguna d’ellas), con a maxima concesión que de forma directa permite a legislación. A día de hue os clubs concesionarios d’os campos no tienen garra dreito legal sobre o suyo uso, ni capacidat churidica pa subarrendar, ni realizar garra tipo d’intervención.
– Guarenciamos entre diez anyos o pago integro por parte d’o Concello d’os consumos d’Augua, Luz, y Césped Artificial. Dependendo d’a instalación entre 60.000 y 80.000 euros anyo.
– Concedemos o dreito legal a os clubs pa subarrendar a tabierna por meyo d’un proceso de licitación publico, en el qual habrá d’haber como minimo 3 interpresas. Entre tot o proceso d’adchudicación i habrá un funcionario municipal verificando a concurrencia d’o mesmo.
– Introducimos o dreito legal d’os clubs a subarrendar as instalacions, creyando Pres Publicos Municipals, de traza que os clubs usuarios que no sían propietarios tendrán guarencias sobre os pres a pagar y os servicios a recibir.
– Limitamos a conduta anual d’os usuarios a un maximo de 350 euros anuals.

Democracia, participación

– Os clubs gestores ferán publicas as suyas cuentas y a que toda a suya actividat sía transparent.
– Dimpués de dos anyos abonando a conduta en un club, se pasa a estar socio d’o mesmo.
– S’estableix a obligatoriedad de fer publicos os dreitos d’os usuarios, incluiu un telefono directo pa queixas y sucherencias.

Seguranza

– O Concello va a instalar desfibriladores (dos fallecidos en o zaguer anyo) en os Campos de Futbol Municipals, obligando a os clubs gestores a o correcto mantenimiento d’os mesmos.
– Se guarencia o cumplimiento d’as normativas hichienico sanitarias de todas as instalacions.
– Se prohiben expresament tot tipo de comportamiento violento u d’insultos, s’obliga a las partes a acazar qualsiquier comportamiento, racista, machista, xenofobo, u qualsiquier atro tipo de discriminación por qualsiquier causa.
– S’obliga a un seguro de responsabilidat civil a os clubs concesionarios.

Ingresos, gastos y canon

– Totz os ingresos derivados de l’uso d’a instalación serán t’o club gestor, publicidat, tabierna, ingresos por taquillas, alquileres d’a instalación, condutas, etc.
– S’estableix un canon en función d’a calidat y cantidat d’os terrenos de chugo:
– 3.000€ por un campo de futbol de césped artificial (Coste anual aproximau pa o Concello 25.000€ anuals).
– 1.700 € pa un campo de césped artificial de futbol 8 (Coste anual aproximau pa o Concello 15.000€ anuals)
– 180 € pa campos de futbol tanto de tierra, como de césped natural.
– O Concello percibirá un 10% d’os ingresos que o club obtienga por o subarrendamiento d’a tabierna.
– En o caso que un club, logue por alto d’un 20% d’os suyos usos as instalacions, habrá d’abonar un 25% d’istes ingresos extraordinarios a o Concello.
– O canon meyo se sitúa entre 4.000 y 5.000 euros, o maximo será aproximadament de 8.000€, y o minimo en 180€
– Totz os gastos en amillorar a instalación se deducen integrament d’o canon anual, (eficiencia enerchetica, aulas d’estudeo, milloras en baños, vestuarios, accesos, etc.)

Igualdat de chenero

– S’obliga a os clubs a que, en un maximo de tres anyos, exista por instalación un equipo de futbol femenín.
– O Concello colaborará con os clubs que lo deseyen en o fomento d’o futbol femenín, con a finalidat d’aconseguir iste obchectivo.
– Si s’acredita a imposibilidat real de l’aconsigo d’ista medida -realizando todas as accions posibles-, a suya no cumplimiento no tendrá conseqüencias de garra tipo t’o club.

Atros usos d’o campo

– O Concello se reserva a posibilidat de l’uso d’a instalación, siempre que no interfiera en as distintas competicions federativas.
– S’obliga a o club concesionario a ceder a instalación, en horario escolar (matinal) a colechios y institutos publicos pa l’uso d’a suya actividat esportiva.

 

Inversions previstas en 2017

Ye urchent regularizar as cesiones pa poder realizar-las con as mas minimas guarencias legals

As Inversions previstas en 2017 t’a millora d’instalacions de futbol d’iniciación y futbol base son importants. Quasi tres millons d’euros. As mas significativas: comienzo d’una important reforma d’o CMF de Casetas; a implantación de césped artificial en o CMF O Cascajo -UD Os Molins-; y sustituciones de césped artíficial en distintas instalacions: CMF Torre Ramona -Santo Domingo Choventut-, José Luis Violeta -UD Montecarlo-, García Traid -CF Hernán Cortés-, CMF O Picarral -Balsas Picarral-, CMF a Camisera -CD Oliver- y CMF Valdefierro -CD Valdefierro-. Amás tamién se renovará o césped d’o CMF l’Almozara -CD Ebro- de forma extraordinaria y difuera d’o mundo d’o futbol s’implantará césped artificial en o Campo de Rugby d’o Velódromo.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies