Entre os días 4 y 5 de mayo, debatimos sobre a chestión d’os servicios publicos entre a chornada organizada por o Concello y Ebrópolis.
A lo largo d’a primera mesa d’o 4 de mayo, “a municipalización d’a chestión d’os servicios publicos, una politica transversal”, amoderada por Pedro Santisteve, hemos puesto conoixer d’a man de Xulio Ferreiro (Alcalde d’A Coruña), Luis Felipe (Alcalde de Uesca), Carlos Sánchez Mato (Concejal de Ficienda d’o Concello de Madrit), María Sánchez (Concejala de Medioambiente de Valladolid) y Eloi Badía (Concejal de Presidencia, Augua y Enerchía d’o Concello de Barcelona), as experiencias en a municipalización d’istas ciudatz -como Valladolid an recientment s’ha remunicipalizado a chestión de l’augua-, os enormes problemas existents en o control y fiscalización d’as grans interpresas y as estorbaduras ta municipalizar os servicios y pa penalizar a las grans contratas.
Os alcaldes y concejales han destacau a importancia de l’autonomía local pa la recuperación d’uns servicios publicos de calidat, an o ciudadano no sía un “client”. En iste sentiu, os representants institucionals asistents en a sesión han destacau as enormes limitacions imposadas por o gubierno de Rajoy, a zaguera d’ellas, a disposición adicional 27 en os Presuposaus Chenerals d’o Estau, que sinyala que con a dentrada en vigor d’a lei de presuposaus, y con una vichencia indefinida, as administracions publicas no podrán considerar como emplegaus publicos ni incorporar-los a ista condición a os treballadors d’as contratas en finalizar o contracto u si se produz un rescate. Isto implica que os treballadors perderían o dreito a la subrogación que tienen reconoixida por a normativa laboral si o servicio se chestiona dende lo publico. En o supuesto, excepcionals seguntes o texto, en el qual o personal sía incorporau a sociedatz mercantils publicas, se contabilizarán como personal de nuevo ingreso d’o cómputo d’a taxa de reposición d’efectivo, la qual cosa imposibilita legalment que se pueda municipalizar garra contrata con un numero de personal elevau, ye dicir, beneficiando a las grans contratas.
A chornada ha continau con una mesa moderada por Alberto Cubero, “Experiencias practicas de chestión directa d’os servicios publicos municipals”, en el qual han participau o gerente d’a Interpresa Municipal de Servicios Funerarios y Cementerios de Madrit, Fernando Sánchez González, o gerente d’a Interpresa Municipal de Transportes de Valencia, Josep Enric García Alemany, asinas como o director cheneral d’a Interpresa Municipal d’Auguas de La Coruña (EMALCSA), Jaime Castiñera, y o consellero delegau d’a Interpresa de Chestión integral de Medina Sidonia (Medina Global S.L.), Santiago Gutiérrez.
Os gerentes y consellers asistents han destacau l’alto compromiso d’os treballadors con os servicios publicos, a necesidat d’empentar una lei de financiación d’o transporte publico y colectivo pa acabar con o desequilibrio entre ciudatz grans y medianas, en o caso d’o gerente d’a Interpresa Municipal de Transportes de Valencia, y han reivindicau a necesidat de chestionar dende lo publico os servicios que replega a Lei de Bases de Rechimen Local, siempre mantenendo o control y a planificación dende lo publico.
