Celebramos os procesos participativos encetaus en os barrios rurals de Sant Chuan de Mozarrifar, Cartuja Baixa y Penyaflor pa decidir as obras y prochectos que serán financiados por o convenio entre o Concello y a Diputación Provincial y denunciamos a situación en os once barrios rurals restantes, an os alcaldes de barrio s’han negau a ubrir procesos participativos.

Os pasaus días 8 y 9 de chunio, os vicos rurals de Sant Chuan de Mozarrifar, Cartuja Baixa y Penyaflor levoron a cabo as votacions ciudadanas pa esleir os prochectos que s’executarán en istes barrios dentro d’o convenio entre o Concello de Zaragoza y a Diputación Provincial de Zaragoza. Un proceso enchegau en quantas fases dende o 19 d’abril con a constitución d’as Mesas, a fase d’elaboración de propuestas, a valoración tecnica y que con a votación aconsigue un hito muit important pa la participación y toma de decisions en barrios rurals.

O proceso en istes tres barrios rurals culminará en os proximos días con a fase de retorno pa informar de quál va a estar a priorización final que se levará a o Consello Territorial d’Alcaldes d’iste martes 13 de chunio y as obras que vaigan a estar finalment executadas y por zaguer, con a fase d’execución y seguimiento d’as obras por parte d’una Comisión Mixta DPZ – Concello, a Comisión de Seguimiento establida en o Concello y o Consello Territorial d’Alcaldes.

Zaragoza en Común valora muit positivament a iniciativa d’os alcaldes de San Juan de Mozarrifar, Cartuja Baixa y Penyaflor pa ubrir a participación vecinal a las qüestions que mas afectan a os vecins y vecinas d’os barrios rurals. “Extender a participación ciudadana a procesos anteriorment tant opacos como a decisión d’as obras y prochectos a levar a cabo en os barrios rurals dentro d’o convenio DPZ – Concello ye un gran paso pa extender a obridura democratica a totz os ambitos d’a vida d’a ciudat”, ha sinyalau Carlos López, portavoz de Zaragoza en Comun y miembro d’o Grupo Motor de Garrapinillos.

Manimenos, hemos de lamentar que iste proceso s’haiga levau a cabo en solament tres d’os catorce barrios rurals d’a ciudat, producto d’a negativa d’os alcaldes correspondients” ha sinyalau López. Pa o portavoz d’a organización municipalista, “si en San Juan de Mozarrifar, Peñaflor y a Cartuja ha estau posible realizar un proceso participativo, en a resta d’os barrios tamién lo ye. Actitutz caciquiles como negar a os vecins y vecinas decidir, solament pueden entender dende o espanto a perder privilegios“.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies