Dicioron que no nos iba a costar ni un euro y s’ha convertiu en o mayor rapo de diners publicos d’a historia. Hemos presentau una moción pa reprobar a o gubierno d’o PP como responsable d’o rescate bancario y de l’amnistía fiscal, que ha estau aprebada por o Pleno Municipal.

“S’acaban de complir 5 anyos dende que Mariano Rajoy, menutos antes de viachar a Polonia a veyer un partiu de futbol, anunciase a solicitut d’o rescate a la banca espanyola por valor de 100.000 millons d’euros a o que denominó “linia de credito”.

A fantesía d’o gubierno d’o PP no se quedó allí, sino que, mentindo a toda a población espanyola, o president Rajoy, a vicepresidenta Soraya Saénz de Santamaría u o ministro d’economía Luis de Guindos aseguroron que o recate no iba a costar ni un euro a os contribuyentes.

Tals afirmacions no tardoron muito tiempo en contrimostrar falsas, ya que o receptor de las aduyas europeas y por tanto qui debe devolverlas, no yera a banca rescatada sino o propio estau a traviés d’o FROB, una entidat publica creyada pa chestionar l’agujero creau por bancos y caixas, agujero muit superior a la valor real d’os activos rescataus.

Seguntes l’informe d’o Banco d’Espanya que se conoixió o pasau 16 de chunio, las aduyas a la banca que ista no devolverá suposarán 60.600 millons d’euros, d’os quals, 39.500 millons correrán a cargo d’os contribuyentes y 21.000 millons a o Fondo de Guarencia de Depósitos (FGD}.

Somos, por tanto, debant d’o mayor rapo de diners publicos que s’ha cometiu nunca en Espanya, Catalunya Caixa recibió 12.676 millons d’euros, estió vendida a o BBVA por 1.165 millons euros y fació fuera a mas d’1.600 treballadors. Bankia estió rescatada con 12.347 millons d’euros publicos y ha despediu a mas de 8.000 treballadors. a CAM recibió 11.065 millons d’euros, estió regalada a o Banco de Sabadell por un euro y i habió mas d’1.250 despidos. NovaCaixaGalicia estió rescatada con 9.159 millons d’euros ta estar dimpués vendida a Banesco por 1.003 millons d’euros con mas d’1.850 treballadors despedius d’ista entidat. 6.143 millons d’euros costó o rescate d’o Banco de Valencia, ta regalar por un euro a CaixaBank y provocar amán de 800 despidos. Unnim Banc, estió rescatada con 2.496 millons d’euros d’as arcas publicas y le la levó por un euro o BBVA entre que se despediba a 1.169 treballadors d’a entidat.

O rescate bancario ye a imachen mas clara de sometimiento de tot un sistema politico a os designios d’a banca: primero se destinaban milars de millons de diners publicos que ·se retallaban d’os servicios publicos y d’as politicas socials. Dimpués se vendeban ixes bancos rescataus a entidatz privadas a pres muit por baixo d’os diners gastaus en o rescate que despediban a milars de treballadors y treballadoras d’o sector bancario. Una privatización d’os beneficios y una socialización d’as perdas que sirve pa beneficiar a beluns d’os causants d’a crisi: fondos d’inversión, directivos de banca, accionistas, inversores y depositantes de mas de 100.000 euros que son os que habrían d’haber feito frent a os costes d’o rescate.

O segundo gran rapo a las arcas publicas propiciado por as politicas d’o gubierno de Mariano Rajoy ye l’amnistía fiscal disenyada por o ministro de Ficienda Cristobal Montoro y que o Tribunal Constitucional acaba d’anular.

Una amnistía que fació aflorar 40.000 millons d’euros -o 4% d’o PIB-pero que recaudó menos d’1.200 millons, ni a metat de l’obchectivo inieial de 2.500 millons y con una ausencia de recaudación pa las arcas publicas de mas de 12.000 millons d’euros que hesen significau no aplicar-la. O gravamen meyo d’ixas fortunas amagadas estió d’o 3% de meya, muit inferior a o 10% anunciau y, en qualques casos, salindo a devolver si entre 2010 y 2012 as carteras d’accions en Suiza daban perdas. Un gran premio por haber defraudado y una pesima chestión de Montoro.

D’os 31.484 acullius a l’amnistía solament se conoixen uns 60 nombres, menos d’o 1%, y veyemos que solament benefició solament a las élites extractivas d’iste país: Politicos corruptos como os populars Rodrigo Rato, Luis Bárcenas, Alberto López Viello u Francisco Granados; familiars d’os mesmos como Micaela Domecq, esposa de l’Arias Cañete, que, como reveloron Os Papels de Panamá, s’acullió a l’amnistía quan o suyo mariu yera ministro d’Agricultura u miembros d’o clan Pujol, Oleguer y Josep Pujol Ferrusola, fillos de l’ex president de Catalunya Jordi Pujol; empresarios como os chirmans Gallardo, propietarios d’os laboratorios Almirall, que afloraron mas de 113 millons d’euros, a familia Escarrer, duenyos d’a hotelera Meliá u miembros d’a familia Thyssen. Por zaguer, a nobleza ya que se conoixen dica quatro barbones en a linia de sucesión: a infanta d’Espanya Alicia de Barbón Parma, l’infante Carlos de Barbón-Dos Sicilias (primo d’o rei Juan Carlos), y Pedro y Cristina de Barbón Dos Sicilias que ocultaron 4 millons en Suiza utilizando os mesmos testaferros, bufetes y sociedatz pantalla que Bárcenas u Rato.

Muitos d’istes nombres son os d’ixes patriotas de pulserita d’Espanya (u de Catalunya) en a man y cuentas en Suiza u atros paraísos fiscals.

A mesma doble moral que usa o Partiu Popular: defensa d’a Constitución Espanyola pa alimentar un conflicto con Catalunya con a finalidat d’obtener réditos politicos y desprecio absoluto a atros preceptos constitucionals basicos como, seguntes relata a sentencia d’o TC, o deber totz “de contribuir a o sostenimiento d’os gastos publicos”. Asinas ye como o PP va desgastando y rompendo día a día a estabilidat y a cohesión d’o estau mientres se le imple a boca en defensa d’un modelo de nación que ha dau a espalda a las suyas chents y os suyos territorios crebando o pacto social d’o 78 que ya no sirve a las mayorías.

Como diz o propio TC, tenemos un Ministro de Ficienda que legitima “como una opción valida a conducta de qui, de forma insolidaria, incumplieron a suya deber tributar”. Con la sincusa d’obtener mas ingresos, Montoro y Rajoy, en preguntas parlamentarias, han chustificau que se puede incumplir a constitución, la qual cosa ye una renuncia d’o Estau a asumir as suyas obligacions.

Con l’obchectivo de recuperar os diners publicos gastaus en as operacions de rescate bancario y o no ingresado con motivo de l’amnistía fiscal pa invertir-lo en politicas socials, revertir los retalles practicaus en os servicios publicos y realizar politicas de reactivación d’a economía, presentamos a siguient

MOCIÓN:

PRIMERO: O Pleno d’o Concello de Zaragoza reprueba a o Gubierno d’Espanya responsable d’o rescate bancario y de l’amnistía fiscal ocasionar perdas a o estau espanyol por mas de 70.000 millons d’euros, y concretament, a Mariano Rajoy, a Soraya Sáenz de Santamaría y a Luis de Guindos por mentir a la población espanyola dicindo que o rescate bancario no costaría brenca.

SEGUNDO: O Pleno d’o Concello de Zaragoza insta a las Cortes Espanyolas a realizar as modificacions lechislativas necesarias pa crear un impuesto sobre os beneficios de cadaguna d’as entidatz financieras que operen en o estau espanyol y que haigan recibiu aduyas publicas, directa u indirectament, dica recuperar a totalidat d’as mesmas.

TERCER: O Pleno d’o Concello de Zaragoza insta a o Gobierno d’Espanya a la fusión d’as entidatz de credito Bankia y Banco Mare Nostrum {BMN) y a no proceder a la desinversión parcial u total a un pre que no permita recuperar a totalidat de las aduyas publicas concedidas a las citadas entidatz.

QUARTO: O Pleno d’o Concello de Zaragoza reprueba y exiche a dimisión d’o ministro Cristobal Montoro por disenyar una amnistía fiscal pa favoreixer a os defraudadores fiscals y que ha estau declarada inconstitucional.

QUINTO: O Pleno d’o Concello de Zaragoza insta a o Ministerio de Ficienda a fer publico o nombre d’os 31.484 defraudadores fiscals que s’acullioron a l’amnistía fiscal en os anyos 2012 y 2013.”

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies