Seguimos dando pasos pa abanzar enta una mayor sobiranía enerchetica en o Concello de Zaragoza. Antes que finalice l’actual contracto d’enerchía, que concluye en noviembre de 2018, o Consistorio habrá realizau totz os trámites necesarios pa concorrer a la compra directa d’enerchía.
Actualment, se son concluindo os trámites pa que o Concello de Zaragoza se dé d’alta como consumidor directo y como achent d’o mercau electrico. D’iste modo s’aconseguirá mayor capacidat en la toma de decisions sobre a compra y l’orichen d’os 118 Gw/anyo que consumen os 1.800 puntos de suministro municipals.
Dende a dentrada en vigor d’a legislación que contemplaba as fases pa la liberalización d’o servicio de suministros enercheticos, hemos iu dando pasos dica a encorporación total en o modelo de contractos chenerals centralizaus de suministro d’enerchía. cal recordar que os zaguers pliegos de condicions relacionaus con l’actividat mantienen o modelo existent, si bien incorporan a obligación de certificación que o suministro provienga 100% de fuents d’enerchías renovables.
Asinasmesmo, por a labor desembolicada dende o Servicio de Conservación d’Arquitectura, s’han aconseguiu uns estalbios en a factura electrica municipal de dica 4 millons d’euros a l’anyo, a traviés de medidas como achustes de potencia contratada, mantenimiento d’edificios, etc. Se tracta d’una apuesta clara por una mayor sobiranía y autonomía frent a l’oligopolio d’as electricas y suposa un nuevo hito en la luita contra o Cambeo Climatico y en la achuga por as enerchías renovables d’iste Concello. Con todas istas medidas ya hemos aconseguiu restar-le quatro millons a las multinacionals electricas y los somos invertindo en amillorar a ciudat.
O modelo actual de chestión se basa en l’adquisición d’a enerchía por meyo d’una interpresa comercializadora, que ye a encargada de comprar/crompar dita enerchía en o mercau y facturarla posteriorment a o Concello. O sistema futuro de chestión d’a compra directa se basará en decisions diarias d’adquisición d’enerchía de traza directa en función d’as necesidatz d’o Concello.