Iste proximo sabado 13 d’aviento, tenemos programada a segunda chornada “Ganar Construindo” en a que continar trobando-nos, debatindo y treballando chuntas ta abanzar Ganemos Zaragoza. Tendrá puesto en o Centro d’Historias de Zaragoza (Sala Mirador) con una sesión de maitíns y unatra de tardes.
Contino tos metemos o programa previsto:

Sesión de maitíns (de 10 a 13 h, con posibilidat de prolargar-lo dica as 14)
Metodo de selección de candidaturas

L’obchectivo d’ista sesión ye elaborar colectivament una propuesta consensuada, sobre a base d’as presentadas en a web http://candidaturas.ganemoszaragoza.com. Dita propuesta se levará t’a proxima asambleya d’o 16 d’aviento t’a suya ratificación. Caso que no sía posible agrupar todas as propuestas en una sola, nos miraremos d’elaborar-ne dos, d’entre as qualas caldrá votar en l’asambleya.

Sesión de tardes (de 17 a 20 h)
Formula churidica

Ista sesión tiene como obchecto prencipal a formula churidica de Ganemos Zaragoza. O disenyo d’a sesión ha estau preparau entre os grupos de Facilitación y de Churidico con l’aduya d’atras personas, pensando en favoreixer a participación d’o mayor numero de personas en un ambient calido de respecto y construcción comuna. Ta ixo, a sesión prencipiará con un chicot treballo arredol d’os prencipios chenerals de Ganemos Zaragoza de traza que nos sía mas facil considerar as diferents posibilidatz de formula churidica en función d’istes prencipios compartius, y con a ideya que a formula que s’esleiga puede estar una ferramienta ta afianzar-los y desembolicar-los.
Sabemos que todas as personas que nos sentimos parte de Ganemos Zaragoza somos conscients d’a oportunidat que tenemos de configurar un verdadero gubierno d’a ciudadanía y, por ixo, ista chornada d’o sabado puede estar un paso muit important ta, a partir de l’asambleya d’o proximo martes, continar treballando cada vez con mas fortaleza.
L’obchectivo d’ista chornada no ye prener una decisión sobre os temas (bella cosa que succederá en a siguient asambleya d’o día 16, 19:00 h. CC Delicias), sino deliberar ta favoreixer a construcción d’unas propuestas lo mas consensuadas posibles, superando as mugas de tiempo que tiene siempre una asambleya.

Por ixo queremos animar-tos a venir o sabado aportando muitas ganas de compartir ideyas, ilusions y puntos de vista que aporten t’o prochecto a enerchía y l’entusiasmo que le dé cada vez mayor empente.

Por favor, confirmar-nos asistencia ninviando un correu a [email protected], con afer “Asistencia chornada 13D”, indicando si venitz de maitíns, de tardes u a las 2.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies