L’aragonés ye un patrimonio cultural de mas de 1000 anyos d’historia y un tresoro que cal cudiar, por ixo creamos a Oficina de l’Aragonés d’o Concello de Zaragoza, presentada por Fernando Rivarés y Carmelo Asensio (CHA) como enmienda propuesta por CHA a os presupuestos municipals de 2017.
A Oficina de l’Aragonés mira d’estar a principal ferramienta d’o Concello de Zaragoza pa la defensa, preservación, protección y difusión de l’aragonés en a ciudat de Zaragoza.
O Concello tien una gran deuda historica con l’aragonés: d’una man, por fer-lo fuera d’as suyas carreras y, d’atra man, por reconoiximiento y respeto a os aragoneses y aragonesas que un día albandonoron a suyas tierras y costumbres pa fer creixer a ciudat de Zaragoza, dixando en bell caso, a luenga aragonesa en o camin.
Os datos estadisticos amuestran que bi ha una realitat viva y choven que charra aragonés y que no cal dixar fuera. Cal aplicar politicas activas y dotar-las con recursos municipals, colaborando con la resta d’as administracions, pero exichindo tamién que concaren as suyas responsabilidatz.
As principals areas d’intervención d’a oficina de l’aragonés son: a sensibilización y dignificación de l’aragonés, a profundización en o conoiximiento d’a luenga, o suyo emplego y difusión, a ensinyanza y a protección de l’aragonés.