Dimpués d’un anyo y meyo de treballo, somos a punto de lanzar l’II Plan d’Igualdat (2017-2020) d’o Concello de Zaragoza. L’I Plan d’Igualdat finalizó en 2011, asinas que yera necesario elaborar una nueva estratechia con l’obchectivo de contribuir a promover una igualdat real entre hombres y mullers y fer d’a igualdat una politica transversal en as diferents arias d’o Concello.
En chinero de 2016 o Servicio d’Igualdat realizó un estudeo d’o suyo treballo y a suya adequación a las necesidatz reals. A la vez, realizamos un estudeo d’a situación social d’os cudiaus en a nuestra ciudat y, d’a man d’a Universidat de Zaragoza, una analís d’a posición d’a muller en o mundo laboral. A partir d’istes documentos, realizamos quantos seminarios con expiertos/as y grupos de debat en el qual participoron mas de 100 personas.
En setiembre obteniemos o primer borrador, que estió penchau en a web pa que a ciudadanía podese consultar-lo y fer aportacions on line. Asinasmesmo, se realizoron quantos tallers presencials pa analisar o borrador y replegar nuevas propuestas.
O paso final ye estando a negociación y debat con os grupos politicos, con l’aspiración que o plan sía un documento consensuado que permita trascender a duración d’iste gubierno.
Tot o proceso, lento y laborioso, responde a una d’as linias de gubierno de ZeC: a democracia participativa como ferramienta d’elaboración de politicas publicas.
Tenendo siempre en mente que quan femos referencia a mullers, nos referimos a mullers diversas (cuerpos, edatz, procedencias, clase…) hemos realizau debatz arredol de 8 linias estratechicas que hemos creito respondeban a las realidatz a transformar:
1. Comunicación y cultura t’a igualdat, pa promover a igualdat en a cultura, a educación y a comunicación.
2. Cudiaus y corresponsabilidad, achugando por un modelo de cudiaus basau en a sostenibilidad d’a vida y cambiando o paradigma en l’asunción d’o treballo de cudiaus.
3. Formación y treballo, transversalizando a perspectiva de chenero.
4. Empoderamiento y participación, exercendo atras formas de liderazgo y participación que no pasen por modelos masculinizados.
5. Violencia de chenero y violencias masclistas, ubrindo o foco ta incluir tamién as exercidas sobre fillos y fillas.
6. Diversidat afectivo-sexual, pa prencipiar a treballar una realidat dica agora ninguneada en as politicas municipals.
7. Vivienda, como ferramienta esencial en l’empoderamiento de mullers y atros colectivos vulnerables por razón de chenero.
8. Hombres, tamién como novedat, pensando en os colaboradors necesarios en la luita por a igualdat.
Iste plan ye concebiu como un proceso vivo, pa que pueda dar respuesta a nuevas necesidatz que emerjan a lo largo d’os proximos anyos, porque mas que un plan, asperamos que sía un camín.